2026 წლის 21-25 აგვისტოს AIA-GESS-ის დელეგაცია მონაწილეობდა საერთაშორისო პროგრამაში, რომელიც განათლებას, მშვიდობის კულტურას, საერთაშორისო თანამშრომლობასა და ახალგაზრდულ დიპლომატიას აერთიანებდა. პროგრამა შვედეთსა და ესტონეთს მოიცავდა და სხვადასხვა ქვეყნის ახალგაზრდებსა და დელეგატებს საერთაშორისო გამოცდილების გაზიარებისა და ახალი კავშირების დამყარების შესაძლებლობას აძლევდა.

პროგრამის ერთ-ერთი უმნიშვნელოვანესი ნაწილი იყო მსოფლიო მშვიდობის კონფერენცია, რომელიც სტოკჰოლმის ისტორიულ City Hall-ში გაიმართა. ღონისძიებას 23 ქვეყნიდან დაახლოებით 500 დელეგატი ესწრებოდა. კონფერენციამ მონაწილეებს მშვიდობის, საერთაშორისო თანამშრომლობისა და ახალგაზრდების როლის შესახებ იდეებისა და გამოცდილების გაზიარების შესაძლებლობა მისცა.

განსაკუთრებით აღსანიშნავია, რომ მშვიდობის კულტურის, საერთაშორისო თანამშრომლობისა და ახალგაზრდების განვითარებაში შეტანილი წვლილისთვის AIA-GESS მშვიდობის სფეროში დაჯილდოვდა და „მშვიდობის ელჩის“ ჯილდო გადაეცა.

ამ მნიშვნელოვან საერთაშორისო აღიარებასთან ერთად, მედლებითა და დიპლომებით დაჯილდოვდნენ ჩვენი სკოლის მოსწავლეები: ბარბარე ბლიაძე, ლილე შალამბერიძე, მარიამ ცაგარეიშვილი, საბა პოპიაშვილი, ნიკოლოზ მახათაძე, ნიკოლოზ გელაშვილი, მარიამ ჭკუასელი, ელენე გოგიძე, ზურაბი დეკანოსიძე და ელენე შატაიძე.

პროგრამა სტოკჰოლმი-ტალინის კრუიზით გაგრძელდა. სხვადასხვა ქვეყნის ახალგაზრდა მონაწილეებსა და დელეგატებს შესაძლებლობა ჰქონდათ, ერთმანეთისთვის გამოცდილება გაეზიარებინათ, პროფესიული და საერთაშორისო კავშირები დაემყარებინათ და სამომავლო თანამშრომლობის შესაძლებლობები განეხილათ.

AIA-GESS-ისთვის მსგავსი საერთაშორისო პროგრამები მნიშვნელოვანია, რადგან ისინი მოსწავლეებს შესაძლებლობას აძლევს, სასწავლო გამოცდილება რეალურ საერთაშორისო გარემოში გააგრძელონ, გაიფართოონ ხედვა და საერთაშორისო თანამშრომლობის პროცესში აქტიურად ჩაერთონ.